ແຂວງຫລວງພະບາງປາຖະກາຖາວັນແມ່ຍິງສາກົນ ຄົບຮອບ 111ປີ

 

ໃນວັນທີ 3 ມີນາ 2021 ທີ່ຫໍປະຊຸມໃຫຍ່ຫ້ອງວ່າການປົກຄອງ ແຂວງຫຼວງພະບາງ, ສະຫະພັນແມ່ຍິງແຂວງຫຼວງພະບາງ ໄດ້ຈັດພິທີສະເຫຼີມສະຫຼອງວັນແມ່ຍິງສາກົນຄົບຮອບ 111 ປີ (8 ມີນາ 1910-8 ມີນາ 2021)ໂດຍການເປັນປະທານຂອງ ທ່ານວົງສຫວັນ ເທບພະຈັນ ຮອງເລຂາພັກແຂວງ ແລະທ່ານ ນາງ ອິນຖາວອນ ພົມມະຈັນປະທານສະຫະພັນແມ່ຍິງ ແຂວງຫລວງພະບາງ ມີສະຫະພັນແມ່ຍິງຂອງພະແນກການ, ນັກທຸລະກິດທາງພາກລັດ ແລະ ເອກະຊົນເຂົ້າຮ່ວມຮັບຟັງ 150 ກວ່າຄົນ.

      ທ່ານ ວົງສະຫວັນ ເທບພະຈັນ ຮອງເລຂາພັກແຂວງ ໃຫ້ກຽດປາຖະກະຖາໃນງານຄັ້ງນີ້ວ່າ: ວັນແມ່ຍິງສາກົນໄດ້ກໍາເນີດຂຶ້ນໃນທ່າມກາງເສດຖະກິດຂອງພວກສັກດີນາ ແລະ ນາຍທຶນຂະຫຍາຍຕົວ. ເມື່ອໂຮງຈັກ, ໂຮງງານອຸດສາຫະກຳຂອງນາຍທຶນຂະຫຍາຍຕົວມັນໄດ້ສ້າງຄວາມຮັ່ງມີໃຫ້ແກ່ພວກນາຍທຶນ, ແຕ່ຊໍ້າພັດເພີ່ມຄວາມທຸກຍາກລໍາບາກໃຫ້ແກ່ຊາວຜູ້ອອກແຮງງານ ໂດຍສະເພາະກຳມະກອນແມ່ຍິງ. ຢູ່ພາຍໃຕ້ລະບອບສັກດີນານາຍທຶນ ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງແຕ່ໄດ້ຮັບຄ່າຈ້າງແຮງງານດ້ວຍລາຄາຖືກ, ເຮັດວຽກບໍ່ມີການຮັບປະກັນ, ບໍ່ມີລະບົບປ້ອງກັນອຸປະຕິເຫດແຮງງານບໍ່ມີການເບິ່ງແຍງດູແລສຸຂະພາບຂອງແມ່ຍິງ ແລະ ເດັກ, ແມ່ຍິງຖືເປັນສິນຄ້າ, ເປັນເຄື່ອງຫຼິ້ນ, ຖືກເຕະຕີ, ຖືກຂົ່ມຂືນທຳຊໍາເລົາ ແລະ ຖືກໄລ່ອອກວຽກ. ໃນເວລາເຈັບເປັນບໍ່ໄດ້ຮັບການປິ່ນປົວ ຕໍ່ກັບສະພາບດັ່ງກ່າວ ໃນວັນທີ 8 ມີນາ ປີ ຄສ 1899, ຊາວກຳມະກອນຕໍ່າແຜ່ນ ແລະ ຕັດຫຍິບ ທີ່ເມືອງນິວຢອກສະຫະລັດອາເມລິກາ ໄດ້ຈັດຕັ້ງໂຮມຊຸມນຸມປະທ້ວງ ແລະ ຄັດຄ້ານຕໍ່ການໃຫ້ຄ່າແຮງງານຕໍ່າ ແລະ ສະຖານທີ່ເຮັດວຽກບໍ່ຮັບປະກັນຕໍ່ສຸຂະພາບ, ການປັດທ້ວງຂອງເຂົາເຈົ້າຄັ້ງນັ້ນ ຖືກຕໍາຫຼວດເຂົ້າສະຫລາຍ ແລະ ຈັບກຸມຈຳນວນໜຶ່ງ, ການປະທ້ວງໄດ້ເກີດຂຶ້ນອີກຫຼາຍຄັ້ງແຕ່ບໍ່ໄດ້ຮັບຜົນ. ຈົນມາຮອດປີ ຄສ 1910 ຂະບວນການຕໍ່ສູ້ແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະທດນາຍທຶນ ຢູ່ທະວີບເອີລົບ ແລະ ໃນປີນີ້ເອງ ກອງປະຊຸມສາກົນກ່ຽວກັບບັນຫາແມ່ຍິງ ຄັ້ງທໍາອິດໄດ້ຈັດຕັ້ງຂຶ້ນ ຢູ່ໂກເປນຮາກນະຄອນຫຼວງ ຂອງປະເທດເດນມາກມີຜູ້ແທນ 100 ກວ່າຄົນ ຈາກ 17 ປະເທດເຂົ້າຮ່ວມ, ກອງປະຊຸມດັ່ງກ່າວ ໄດ້ຮັບຮອງ ແລະ ຕົກລົງເອົາ ວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ.

ວັນທີ 8 ມີນາ ແມ່ນເຫດການ-ການເມືອງທີ່ສຳຄັນ, ເປັນຂີດໝາຍ ແຫ່ງໄຊຊະນະອັນເປັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທຳ ໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ທວງໃຫ້ນາຍທຶນແກ້ໄຂຊີວິດການເປັນຢູ່ພາຍໃຕ້ຄໍາຂວັນ “ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ” ນັບແຕ່ນັ້ນມາ ວັນທີ 8 ມີນາ ຈຶ່ງເປັນວັນແມ່ຍິງສາກົນ ຊຶ່ງມາຮອດປີ 2021 ນີ້ຄົບຮອບ 111 ປີພໍດີ.

ຂ່າວ: ຈຳປາ